Ja hérna, ræðan hennar Gyðu og mótmæli gegn batman.is og tilverunni eru bara orðin efniviður í Kastljósþátt. Áðan voru Haukur, formaður Frjálshyggjufélagsins og einhver kona úr femínistafélaginu, sem ég þekkti því miður ekki, gestir þáttarins.

Allavegana, þá í fyrsta lagi þá fór lokakomment femínistans í taugarnar á mér. Það var eitthvað á þá leið að: "alls staðar, þar sem konur hafa staðið uppog barist, þar hefur verið mótmælt". Þarna er verið að gera rosaleg fórnarlömb úr þessum félögum úr femínistafélaginu. Ég er á því að flestir hafi mótmælt vegna þess að aðferðir og tillögur femínistana hafa verið öfgafullar, ekki vegna þess að menn séu á móti baráttu femínista. Það að menn mótmæli því að femínistar útbýti refsingum án dóms og laga, er ekki það sama og þegar menn mótmæltu kröfum femínista um kosningarétt eða annað slíkt á árum áður.

Það er líka annað, sem fer í taugarnar á mér í jafnréttisumræðunni (og er í raun ótengt efni Kastljós þáttarins). Það er þegar er verið að tala um jafnhæft fólk. Þannig að oft er dæmt í málum á þann veg að umsækjendur hafi verið jafnhæfir vegna þess að þeir hafi sömu menntun/reynslu.

Málið er einfaldlega að það að ráða fólk í vinnu snýst um svo miklu meira en hvort fólk hafi rétta menntun og reynslu. Langoftast (að ég tel) er það hvernig fólk kemur fyrir, hvernig það sér hlutina og hvernig það talar, sem hefur mest áhrif á val á starfsfólki.

Í fyrra þá sóttu einhverjir 20 nemendur úr hagfræðideildinni minni um starf hjá sama fjárfestingabankanum. Þeir voru allir með sömu menntun og allir með svipaða reynslu. Sá, sem fékk starfið fékk það ekki vegna þess að hann væri svartur eða strákur, heldur vegna þess að fulltrúar fyrirtækisins kunnu betur við hann. Kannski var hann skemmtilegri, eða örlítið klárari, eða með skírari markmið heldur en hinir. Þessa þætti er ekki hægt að mæla og því er ómögulegt að staðhæfa að tveir umsækjendur séu jafn hæfir.

Annars, þá líður mér nú ekkert alltof vel að vera að hamast á femínistum. Ég veit að systir mín yrði ekkert alltof ánægð með það. Ég er sammála mörgum kröfum femínista, svo sem að ekki sé mismunað á grundvelli kyns. Ég held þó að þetta félag sé, að mörgu leiti, á villigötum.

Unnur skrifar frábæran pistil um félagið. Ég efast um að það séu bloggarar á Íslandi, sem eru jafn einlægir í skrifum sínum og hún.

Þessar pælingar áttu upphaflega að birtast sem komment hjá Má en ég ákvað að setja þetta bara á þessa síðu. Þetta eru því viðbrögð við þessum skrifum hjá Má og þessum hjá Svansson.net.

Mér finnast þessir draumar femínistans Gyðu vera alveg ótrúlega magnaðir (ég hvet alla til að lesa draumana). Ég vil fyrst og fremst setja STÓRT spurningamerki við Veru drauminn:

Þarna finnst mér á afar óábyrgan hátt vera að gefa það í skyn að konur eigi að taka lögin í sínar eigin hendur. Þarna er verið að hvetja til þess að þær ráðist á kynferðisafbrotamenn og reyni að niðurlægja þá á opinberum vettvangi.

Ok, áður en einhverjir bjánar telja mig vera að verja nauðgara þá vil ég náttúruega setja þann fyrirvara að svo er auðvitað ekki.

Jafnvel þótt að réttarkerfið sé ekki alltaf réttlátt þá er það ótrúlega óábyrgt í siðuðu þjóðfélagi að hvetja almenning til andlegs ofbeldi til þess að refsa mönnum fyrir gjörðir þeirra. Réttara væri að berjast fyrir úrbótum í réttarkerfinu.

Það er verið að fara útá mjög hálan ís þegar ákveðnir hópar í þjóðfélaginu telja sig hafa einhvern rétt til þess að dæma menn og deila út refsingum, sem þeir (þær) telja við hæfi.

Þau Trott hjónin, sem eru snillingarnir á bak við Movable Type eru að fara að setja af stað blogg þjónustu, svipaða og Blogger, sem mun nefnast Typepad. Þetta mun verða þjónusta, sem notendur borga mánaðargjald fyrir. Þar mun fólk geta sett upp einfalt en fullkomið blogg, sem er vistað útí heimi. Þannig þarf fólk ekkert að hafa kunnáttu á PHP eða FTP eða Perl, sem er nauðsynleg til að fólk geti sett upp Movable Type, sem er án efa besta blogg kerfið í dag.

Ben Hammersley hefur fengið að prófa Typepad og hann skrifar um forritið í The Guardian. Þar segir meðal annars:

Þetta kerfi lofar mjög góðu og það verður spennandi að sjá hvernig þetta mun virka. Sennilega mun þetta ekki höfða til Movable Type notenda, þar sem þeir eru búnir að ganga í gegnum allt vesenið við að koma upp blogginu sínu, heldur fyrst og fremst þeirra, sem nota Blogger í dag en vilja bæta við eiginleikum við bloggin sín.

By the way, þá hvet ég alla, sem nota Movable Type til þess að leggja fram pening fyrir notkunina. Þau hjónin eiga það svo sannarlega skilið.

Þetta er nokkuð mögnuð síða (þarf Java)

Síðan tekur upplýsingar um "Related Sites" úr Google og teiknar upp hvernig síður tengjast saman. Mjög skemmtilegt. (via Mefi)

Þótt ótrúlegt megi virðast þá er þessi bloggsíða mín nú þriggja ára gömul. Fyrsta færslan var skrifuð 22. apríl 2000. Þá var ég á öðru ári í hagfræði útí Chicago og mig langaði að prófa að skrifa vefleiðara einsog Björgvin Ingi og Geir Freyr höfðu verið að gera í nokkrar vikur.

Ég hafði haldið úti fremur dapri heimasíðu í nokkurn tíma en mér fannst hún ekki ýkja áhugaverð, þar sem hún var nánast aldrei uppfærð. Því fannst mér vefleiðaraskrif vera sniðug hugmynd.

Ég hef allavegana enst í 3 ár og eftir mig liggja einhverjar 800 færslur, allt frá stuttum færslum um bíóferðir og djamm í upphafi til lengri pistla um pólitík núna uppá síðkastið. Síðan hefur í gegnum tíðina breyst úr því að vera dagbók á meðan ég var erlendis í námi, til þess að fjalla meira um pólitík og íþróttir og minna um mitt einkalíf.

Ég ætla nú ekkert að monta mig en það eru nú ekki margir á Íslandi, sem hafa enst jafn lengi og ég án þess að stoppa. Oft hafa uppfærslurnar dottið niður en alltaf hefur eitthvað komið til, sem hefur endurnýjað áhuga minn á þessari síðu. Ég vonast til þess að mér takist að halda uppi áhuga mínum og lesenda áfram.

Þegar ég var á Players á miðvikudaginn að horfa á Arsenal ManU, þá kom þessi Honda auglýsing í hálfleik. Þetta er einhver sú allra magnaðasta auglýsing, sem ég hef séð og það var nærri dauðaþögn á staðnum allan tímann.

Það ótrúlega við auglýsinguna er þó að það var ekki notuð nein tölvugrafík við gerð auglýsingarinnar, heldur þurfti til 605 tökur til að fá allt til að ganga upp. Ótrúlega magnað.

Sem áhugamaður um markaðsmál þá finnst mér alveg ótrúlega sorglegt hvernig Tal og Íslandssíma hefur nú verið breytt í Og Vodafone.

Alveg frá byrjun hefur mér fundist TAL hafa staðið framar flestum fyrirtækjum á Íslandi í markaðssetningu. Nafn fyrirtækisins, vörumerki, auglýsingar og allt kynningarefni hefur ávallt verið frábært. Ég efa það að annað fyrirtæki á Íslandi geti státað af jafn flottri og samhæfðri markaðsstefnu og TAL.

Og núna á að henda öllu þessu efni og fara að "döbba" breskar Vodafone auglýsingar. Það þykir mér frekar sorgleg þróun. Hefði ég ráðið einhverju hjá Íslandssíma og TAL hefði ég einfaldlega sameinað bæði merkin undir nafni TAL.

Þessi stuttmynd: The Best Man er hrein SNILLD!

Myndin er í boði Budweiser og er vel þess virði að eyða 10 mínútum í. Ég hló allavegana mjög mikið.

Donald Rumsfeld og Mohammed Saeed al-Sahaf upplýsingamálaráðherra Íraka hafa farið á kostum á blaðamannafundum undanfarið.

Þó held ég að ekkert toppi Írakann á blaðamannafundum.

Rumsfeld átti þó gott komment í gær:

Jens benti í kommentakerfinu á heimasíðu tileinkaða írakska upplýsingamálaráðherranum. Hann er alveg óborganlega fyndinn. Nokkrir gullmolar:

Fyrir áhugasama, þá eru hérna kynlífsráðleggingar Donald Rumsfeld

Á leiðinni heim úr vinnunni rakst ég yfir á Létt 96.7. Þar var verið að spila "Baby I Love Your Way/Freebird" með hljómsveitinni Will to Power. Þetta er án efa einhver stórkostlegasti viðbjóður allra tíma. Þarna tók eitthvað 80's band sig til og tók kafla úr Baby I Love Your Way eftir Peter Frampton og kafla úr snilldarlaginu Freebird eftir Lynyrd Skynird, blandaði lögunum saman, settu takt undir og sungu saman. Hörmung!

Á þessari síðu eru akkúrat núna 3 myndir af Ingibjörgu Sólrúnu! Ég held að Stefán og Björn Bjarna ættu að stofna klúbb. Þar gætu þeir hist og skipst á hatursgreinum um Ingibjörgu. Á síðunni má líka finna besta titil á pistli, sem ég hef séð í langan tíma: OECD styður Sjálfstæðisflokkinn. Stórkoslegt!

Og já, ég hitti Guðmund Svansson bloggara á Hverfisbarnum. Just for the record, þá er myndin af mér 10 mánaða gömul, var tekin fyrir háskólaútskriftina. Ég held að ég hafi ekki breyst neitt svakalega síðan þá. Og ég er 180 cm hár! Hvað hélt hann eiginlega að ég væri hár?

Eru þetta ekki merkileg tíðindi í bloggheimum? Einn af guðfeðrum bloggsins að snúa aftur? Allt er hægt, víst Már er byrjaður aftur.

Mig langar að koma á framfæri nokkrum ábendingum til þeirra, sem blogga. Ég held að þær gætu gert aflestur síðna mun betri.

1. Hafðu mynd á þér á blogginu! Það gefur síðunni meiri karakter. Einhvern veginn missi ég fyrr áhugann á síðum ef ég veit ekki hvernig viðkomandi lítur út. Mér finnst mjög gott að vita að Bjarni lítur svona út og að Katrín lítur svona út.
2. Reyndu að hafa útlit síðunnar einstakt. Ég er ekki að tala um síður allra eigi að vera einhver listaverk. Það er hins vegar býsna þreytandi að lesa síður sem nota bara basic blogger template-in (til dæmis þetta). Ef þú kannt eitthvað pínku í HTML eða CSS breyttu þá síðunni aðeins (ef þú kannt ekki neitt, fáðu þá einhvern annan til að breyta). Settu aðra liti eða eitthvað. Það er mun betra að aðgreina síðuna ef að útlitið er öðruvísi. Lykilatriðið er að síðan þín sé ekki eins og allar aðrar. Til dæmis er síðan hans Ágústs ekkert hönnunarsnilldarverk en hún er hins vegar einstök. Það gefur henni aðeins meiri karakter.

Þetta voru bara punktarnir tveir, sem ég vildi koma til skila. Eflaust er hægt að bæta bloggsíður á mun fleiri máta en þetta er allavegana, að mínu mati, góð byrjun.

Time, í tilefni 80 ára afmælis, hefur valið 80 merkustu daga síðustu 80 ára. (via MeFi

Af einhverjum óskiljanlegum ástæðum komst fæðingardagur minn, 17. ágúst 1977 ekki á listann.

Síðustu tveir dagar á listanum eru 29. janúar á síðasta ári þegar Bush flutti Axis of Evil ræðuna og 11. september 2001.

Þetta er gríðarlega fróðlegur listi. Auk flestra stórviðburða eru þarna nokkrir atburðir úr dægurmenningu:

Dagurinn, sem Viagra kom út
Star Wars frumsýnd
Apple stofnað
Bítlarnir koma fram hjá Ed Sullivan
Pollock heldur fyrstu sýninguna sína
Jackie Robinson varð fyrsti svertinginn til að spila í MLB deildinni í hafnabolta
Fyrsta Superman blaðið
Mikki Mús kemur fram á sjónarsviðið

Annars er allur listinn gríðarlega athyglisverður. Allir ættu að geta lært eitthvað.

Eru Frakkar gersamlega að tapa sér?

Mikið vona ég nú að bandaríkjahatur friðarsinna á Íslandi sé ekki komið svona langt.

Einnig er þetta hneyksli:

Það er aldeilis að sumir Frakkar gera sér grein fyrir sögu landsins og hverjum þeir mega þakka frelsi sitt.

Ég ætla ekki að reyna að vera sniðugur. En hérna er listi yfir 100 bestu aprílgöbb allra tíma.

Mér finnst númer 17 einna best:

Snilld!