eoe.is

Hey, vissuð þið að Verve eru byrjaðir aftur saman og eru nýbúnir að gefa út plötu, sem fær fjórar stjörnur í Rolling Stones? Ég hafði allavegana ekki hugmynd um það en var verulega glaður þegar ég heyrði af því.

Hérna er fyrsta smáskífan og hún lofar góðu: Love is Noise

Eins frábær söngvari og Richard Aschroft er, þá er hann algjörlega ómögulegur án hinna Verve meðlimanna einsog síðustu 10 ár sólóferils hans sýna fram á. Það er hreinasti glæpur að þessi hljómsveit hafi ekki gefið út plötu í 11 ár síðan þeir gáfu út hina STÓRKOSTLEGU Urban Hymns árið 1997, sem var ásamt Ok Computer með Radiohead það langbesta sem kom út það ár.

Ég sá Aschroft spila á klúbbi í Chicago fyrir nokkrum árum og það var sorgleg upplifun. Hann er ekki nema 36 ára gamall, svo hann á nóg eftir og það er vonandi að hann hafi lært af þessum sóló mistökum og haldi núna hljómsveitinni saman.

Hver kannast ekki við þetta vandamál?

Sannarlega uppfinning ársins.

(via Dan Lyons)

Núna hefur magaverkur bæst í fjölbreytta flóru veikinda hjá mér. Núna er ég að jafna mig á hné-aðgerð, með hausverk, viðbjóðslega hálsbólgu og kvef. Þessu viðbótar er kærastan mín í útlöndum þannig að það er enginn hérna til að vorkenna mér – og svo er ég að fara í vinnuferð til útlanda á mánudaginn.

Sjálfsvorkunin hefur náð nýjum og óvæntum hæðum.

Til viðbótar því að ég er að undirbúa vinnuferðina, þá er ég líka að flytja úr íbúðinni minni. Ég seldi hana fyrir einhverjum vikum og þarf að afhenda hana í næstu viku. Þar sem ég er að fara til Stokkhólms á mánudagsmorgun þá þarf ég að klára að flytja allt draslið mitt útúr íbúðinni á sunnudaginn. Þar sem hnéð er enn í rugli þá á ég voðalega erfitt með að flytja hluti niður fjórar hæðir þannig að ég þarf sennilega að væla einhverja greiða útúr vinum mínum.

Væl væl væææææl!

Í viðbót við allt þetta þá fer það viðbjóðslega í taugarnar á mér að sumarið á Íslandi sé búið í kringum miðjan ágúst mánuð.

Ok, núna þarf ég ekki að tuða meira næstu vikurnar.

Ég elska Bill og Hillary. ELSKA þau!

Leikur einhver minnsti vafi á því að þessi tvö lög eru lög sumarsins 2008?

Lesa áfram »

Ok, hérna er seinni parturinn af þessu uppboði mínu. Ég er að selja þessa hluti í einum pakka. Þannig að allt sem er á hverri mynd er selt saman. Ég vil losna við þetta allt, þannig að lágmarksboð í alla hlutina er 500 kall (nema íslenski DVD pakkinn). Uppboðið endar kl 20 á föstudagskvöld!

Lesa áfram »

Vegna flutninga (skrifa um þá síðar), þá er ég að selja eitthvað af dótinu mínu (það er það sem ég hef ekki selt á uppboðum undanfarin ár.

Uppboðinu hefur fylgt alls kyns basl, þannig að núna vil ég selja hluti í færri en stærri einingum. Þetta er annars vegar myndavél og svo hins vegar DVD / Xbox leikir. Þetta verður ekki merkilegt, en ég ætla samt að gefa allt sem ég fæ til góðgerðarmála. Það verður hægt að bjóða í hlutina fram á föstudagskvöld og fólk verður að sækja hlutina á laugardaginn. Uppboðinu lýkur kl 20 á föstudagskvöld.

Ok, fyrst er það semsagt Canon EOS 20 D myndavél. Hún er með 18-55 mm linsu. Þetta er frábær vél fyrir langflesta, en ég er nýbúinn að kaupa mér aðra vél. Vélin er 3 ára gömul og í nokkuð góðu ástandi, þótt hún hafi vissulega ferðast víða. Á Flickr síðunni minni geturðu séð slatta af myndum, sem ég hef tekið með þessari vél, þar með talið allar myndirnar frá Mið-Austurlöndum (Sýrland og Líbanon) (og hérna geturðu séð myndir sem að aðrir hafa tekið með henni). Hérna eru allar tækniupplýsingarnar um vélina.

Hérna er mynd af vélinni. Með henni fylgir taska og hleðslutæki

Mér finnst sanngjarnt verð vera allavegana 20.000 krónur.

Einnig er ég að selja 50 mm linsu. Hún er mjög nýleg og þetta er verulega góð linsa. Hentar sérstaklega vel í aðstæður þar sem það er lítil birta.

Mér finnst sanngjarnt verð vera allavegana 10.000 krónur.

Einnig ætla ég að gera eina lokatilraun til að selja ATV sjónvarpið mitt. Þetta er sjónvarp sem hefur verið inní geysmlu hjá mér og ég held að ég hafi ekki horft á það í þrjú fjögur ár. Þetta er 21 tommu sjónvarp með fjarstýringu og er í mjög góðu ástandi. Skoða mynd. Lágmarksboð: 100 krónur.

Einsog áður, þá setjiði bara ykkar boð í komment við þessa færslu!

Kannski ætti ég að taka oftar til í krydd hillunni minni.

Þetta grill hefur verið útá svölum á Hagamelnum síðustu 4 árin.

Selst hæstbjóðanda.

Þetta graf sem fylgir með þessari Washington Post frétt sýnir greinilega hvar áherslur manna liggja í bandarískum stjórnmálum.

Grafið sýnir það hvernig skattatillögur frambjóðendanna munu koma við fólk í mismunandi innkomu-hópum í Bandaríkjunum.

Tillögur McCain koma best við þá sem eru með meira en 233 milljónir króna í árslaun en Obama þeim best sem eru með minna en 1,5 milljón í árslaun.

(via Daily Kos)

Annars hlytur fyndnasta fréttin úr bandarísku kosningabaráttunni að vera sú að McCain, sem hefur gert allt til að láta Obama líta út sem hann sé úr tengslum við bandarískan raunveruleika, gat ekki svarað því hversu mörg hús hann sjálfur á! Samkvæmt heimildum Politico á McCain 8 stykki.

Mikið afskaplega er ég ánægður með þetta val hjá Obama.  Biden var að mínu mati klárlega besti kosturinn í stöðunni, bæði væri hann líklegastur til að hjálpa Obama til að vinna og svo væri hann sennilega besti varaforsetinn af þeim sem komu til greina.

Hérna er ágætis pistill frá David Brooks (sem er íhaldsmaður) um það af hverju Biden sé góður valkostur fyrir Obama.

Klukkan er hálf ellefu á föstudagskvöldi og ég sit á sófanum heima með vinstri löpp uppí loft, horfandi á Real World Hollywood.  Ég var í aðgerð á hné í gær sem tókst ágætlega.  Fyrstu helgina í júlí í sögulegri útilegu í Úthlíð lenti ég í smá gamni slagsmálum við vin minn, sem enduðu nokkuð illa.  Síðan þá hef ég verið að drepast í hnénu og var því ákveðið að ég færi í aðgerð.

Hún þýðir að ég þarf að taka því rólega næstu daga og fæ ekki að fara í líkamsrækt í heilan mánuð, sem er hreinlega fáránlegt.

* * *

Horfði á íslenska landsliðið komast í úrslit á Ólympíuleikunum og var með tárin í augunum þegar að leikurinn kláraðist, að springa úr þjóðernisstolti.  Mikið afskaplega var þetta gaman.

(uppfært: Aggi tók saman nokkrar erlendar blaðagreinar um íslenska liðið á Liverpool blogginu.  Ég mæli með þeim.)

* * *

Um síðustu helgi fór ég ásamt kærustunni minni til Boston í helgarferð.  Ryan, sem var herbergisfélagi minn í Northwestern, var að giftast Kate – sem ég þekkti líka frá Northwestern árunum.  Við fórum út á miðvikudeginum og eyddum fimmtudegi, föstudegi, sunnudegi og mánudegi í Boston.  Löbbuðum Freedom Trail, versluðum á Newbury, fórum með Dan vini mínum og Carrie kærustu hans á Fenway þar sem við sáum Red Sox rústa Texas Rangers, borðuðum fáránlega góðan mat, drukkum slatta af Bud Light og góðu víni og skemmtum okkur einfaldlega ótrúlega vel.  Klárlega skemmtilegasta borgarferð, sem ég hef farið í.

Á laugardaginn keyrðum við svo upp til Harvard, sem er lítill bær vestur af Boston.  Þar fór brúðkaupið fram undir berum himni uppí sveit.  Athöfnin var ótrúlega skemmtileg og brúðkaupsveislan var einnig frábær.  Ótrúlega persónuleg veisla, sem var laus við allt snobb og var uppfull af skemmtilegum atriðum, frábærum ræðum, góðri tónlist og fleiru.  Saman gerði þetta helgina algjörlega ógleymanlega.

* * *

Þegar ég kom heim gat ég svo flutt inná nýja Serrano skrifstofu í Kópavogi.  Núna er ég í fyrsta skipti í sögu fyrirtækisins kominn með mitt eigið skrifborð á okkar eigin skrifstofu.  Hingað til hafði ég unnið mína vinnu heima hjá mér, í lítilli kompu uppí Kringlu eða á kaffihúsum bæjarins.  Við vorum reyndar með aðra skrifstofu síðustu mánuði en þar var ég á einhverju asnalegu móttökuborði þar sem ég gerði lítið en að vísa fólki inná aðrar skrifstofur.

Jæja, ég ætla að snúa mér aftur að sjónvarpsglápi.

Þetta eru hreint ótrúlega magnaðar myndir af hæstu byggingu í heims, Burj Dubai, sem er verið að klára í Dubai.

Hérna má sjá þverskurðarteikningu af byggingunni, sem nær 70 metra ofaní jörðina og 819 metra uppúr jörðu.  Þessi bygging er til dæmis þrjú hundruð metrum hærri en Sears Tower í Chicago.

Hérna eru fleiri myndir: Séð yfir nágrennið.  Horft uppá bygginguna.

Það er alveg ljóst að næst þegar ég flýg með Emirates, þá mun ég stoppa einhverja daga í Dubai.

(via)

Ó ég elska blogg.  Bara á bloggsíðum er vinskap þínum við nokkra SUS-ara gert gert jafnhátt undir höfði og því að þú sért doktor frá Harvard og vinnir sem lektor hjá Columbia.  Sjá þetta hjá Agli Helga:

Líkt og bloggarinn Sveinn Pálsson bendir á tókst að finna einn hagfræðing sem styður vaxtastefnu Seðlabankans. Þetta er Jón Steinsson, hámenntaður hagfræðingur frá Ameríku, en líka félagi Borgars Þórs Einarssonar, Árna Helgasonar og Þórlinds Kjartanssonar úr Deigluhópnum.

Jahá!

Annars segir Jón, einsog allir skynsamir menn, að við eigum að taka upp evru.

(via)

Ég er í alveg ótrúlega góðu skapi í dag.  Er að bíða eftir vini mínum, sem ætlaði að hitta mig í hádegismat, og svo þarf ég að fara heim til að klára að pakka því ég er að fara út til Boston á eftir.

Herbergisfélagi minn úr háskóla, Ryan, er að fara að giftast góðri vinkonu minni, Kate.  Við þrjú bjuggum saman fyrsta árið okkar í háskóla og ég hef alltaf þóst eiga einhvern smá hlut í þeirra sambandi.  Þau búa núna í Boston (eftir að hafa búið síðustu ár í New York) og ætla að gifta sig á laugardaginn í smábæ rétt fyrir utan borgina.

Ég ætla því að njóta lífsins í Boston næstu daga og ætla m.a. að hitta Dan vin minn og fara með honum á Fenway á fimmtudag til að sjá Boston Red Sox spila – erum komin með ágætis miða á þann leik.  Í tengslum við brúðkaupið er svo þriggja daga dagskrá, allt frá kvöldmat á föstudaginn fram að morgunmat á sunnudag.

Ég get ekki beðið.

Þessi grein eftir mig birtist á Vefritinu.

* * *

Þegar ég var að vinna að lengri grein fyrir næsta tímarit Herðubreiðar lenti ég í spjalli við vini mína um almennt viðhorf á Íslandi gagnvart Gyðingum og Ísraelsríki. Almennt séð virðist það viðhorf vera afskaplega neikvætt. Þegar ég reyndi aðeins að kynna mér þetta á bloggsíðum hjá fólki virtist oft vera ansi grunnt á stækum Gyðingafordómum.

Margir halda því fram að aukning á Gyðingafordómum megi eingöngu rekja til aðgerða Ísraels-ríkis.  Sú fullyrðing er fáránleg.  Í raun eins fáránleg og þegar að verjendur Ísraels ríkis halda því fram að öll gagnrýni á Ísrael sé sprottin út frá Gyðingahatri. Því fer fjarri, enda hefur Ísraels-ríki gert sig sekt um fjölmarga hluti sem réttmætt er að gagnrýna.

En hvernig er hægt að greina lögmæta gagnrýni á Ísrael frá gagnrýni sem er að vissu leyti byggð á Gyðingafordómum? Alan Dershowitz leggur í bók sinni The Case for Peace: How The Arab-Israeli Conflict Can Be Resolved til skilgreiningar á því hvernig greina megi þar á milli. Á meðal þeirra atriða sem Dershowitz segir benda til þess að gagnrýnin sé komin til vegna Gyðingafordóma nefndi hann:

• Að halda því fram að Ísraelar séu verstir allra þjóða í einhverju jafnvel þótt það sé fjarri sannleikanum.
• Þegar aðgerðum Ísraela er líkt við Nasista
• Að vilja refsa Ísraelum einum fyrir hluti sem viðgangast í mörgum löndum og að gera þá kröfu að Gyðingar séu á einhvern hátt betri vegna sögu þeirra sem fórnarlamba.
• Að kenna Ísrael um öll vandamál heimsins og ýkja áhrif deilnanna í Ísrael og Palestínu á alþjóðastjórnmál.
• Þegar ákveðnar steríótípur sem oft eru notaðar af Gyðingahöturum eru notaðar til að lýsa öllum stuðningsmönnum Ísraelsríkis. Svo sem þegar mikið er gert úr völdum Gyðinga um allan heim (t.d. í Bandaríkjunum) eða þeir eru teiknaðir sem grimmir og ljótir gamlir menn með löng nef.

Í tengslum við greinina eyddi ég smá tíma í að skoða bloggfærslur tengdar fréttum af Ísrael og Palestínu á MBL.is. Margar þessara frétta virtust vera frétta-tilkynningar frá samtökunum Ísland-Palestína, þar sem sagt var af ævintýrum sjálfboðaliða þeirra samtaka. Aðrar voru helst af ferðalagi Barak Obama um svæðið og nýlegum árásum á Gaza.

Hérna fylgja með nokkur ummæli sem sýna að umræðan um Ísrael er oft ekki á háu plani á íslenskum vefmiðlum. Hugsanlega er hægt að finna svipuð komment um Palestínumenn, byggð á öðruvísi fordómum. Þar sem að um það hefur m.a.s. verið skrifuð bók þá ákvað ég að velja Gyðingahliðina á umræðunni. Tilvitnanirnar eru orðréttar og því hafa stafsetningarvillur ekki verið leiðréttar.  Tilvitnanirnar fann ég allar á á um tveggja klukkustunda rápi um Moggabloggið með aðstoð Google.

Fyrst er það mýtan um hina almáttugu Gyðinga, sem allir þurfa að beygja sig undir í Bandaríkjunum, þrátt fyrir að Gyðingar séu í raun aðeins 2,5% af íbúum Bandaríkjanna.

Óskabarn BNA engu skárri en fyrri forsetar

Barack Hussein Obama er greinilega á sömu bylgjulengd og fyrri foreldrar Ísraels og ætlar hann sér að halda uppi þessari arfleyfð sem ætlar að vera seindræpari en Rasspútín. Ef marka má orð hans og gjarðir er hann mikill vinur lobbíista gyðinga í Bandaríkjunum sem eru jú þeir sem krefjast þess hvað mest að Ísrael sé verndað gegn öllum sem ætla sér að vinna eitthvað gegn Ísrael. Það er líka vitað að það er nánast ógjörningur að verða forseti Bændaríkjanna án þess að hafa stuðning gyðinga og er þetta sagt án allra fordóma. Þetta virðist bara vera svona. Má vera að þessi fullyrðing virðist fordómafull en það er hún ekki, með henni er aðeins verið að sýna hve mikil völd gyðingar í Bændaríkjunum hafa. Þeir eiga gríðarlegt fjármagn, stjórna mörgum stórum fyrirtækjum og blöðum svo fátt eitt sé nefnt.

Ekki séns!

þetta hlýtur að vera ein allsvakalegasta sýndarmennska sem til er. Bandarísk yfirvöld munu aldrei sjá til þess að Palestína öðlist sjálfstæði, og þar af leiðandi, sín eigin viðurkenndu landamæri. Ísraelar hafa í gegnum tíðina haft gríðarlegt tangarhald á bandarískum yfirvöldum. Peningarnir eru bara of stórir í þessum bransa…

Ofbeldi ísraela tekur á síg ótrúlegustu myndir

Ég heyrði því fleygt að nokkrir þeirra “vina Villa vitlausa í Köben” sem skrifa undir “(IP-tala skráð)” af því að það er búið að loka hjá þeim aðganginum að Mbl.is/blogg, séu á launum. Það væri gaman að heyra hvort þeir peningar koma frá Köben, New York eða beint frá Ísrael!

Hvenær drepur maður börn?

Ísraelski herinn og Mossad leyniþjónustan eru tæknivæddustu og fullkomnustu drápsvélar heimsins í dag dyggilega studdum af bandarískum gyðingum

Næst er það algengt stef um að Gyðingar telji sig vera yfir aðrar þjóðir hafna. Menn mistúlka “Guðs útvalda þjóð” einsog það þýði að Gyðingar telji sig öðrum betri.

Framferði ísraela

Gyðingar segjast eiga rétt á landsvæðinu sem var tekið frá Palestínumönnum, því; 1. Þeir séu guðs útvalda þjóð 2. Guð gaf þeim landið (má ég sjá afsalið?).

[og]

Þeirra framferði er íslensku þjóðinni til skammar því við erum með stjórnamálasamband við þessa villimenn

Það minnkar einmitt árásirnar!

Ísraelar eru hálfvitar [og] Ég hef ekkert á móti gyðingum sem slíkum, en Ísralesstjórn sýnir djöfullegan hroka og fíflaskap haldandi því fram að þeir séu hin guðsvalda þjóð og ég veit ekki hvað og hvað

fordómar ísraela

Það er dagljóst að ísraelsmenn eru uppfullir af fordómum gagnvart öðrum þjóðum og telja sig öðrum þjóðum æðri. Þeir vilja ekki fyrirgefa og fyrirgefa ekkert.. Þeir hanga á gamla testamentinu eins og heilögum sannleika og nota hana til þess að fá afsökun til þess að misþyrma nágrannþjóðum sínum. Israelar eru aumkunnarverð þjóð í alla staði.

[og]

Maður gæti alveg huxað sér heiminn án ísraelsríkis

Skyldi vera reiði í Ísrael yfir palestínsku börnunum…

Ah, auðvitað ekki, fyrir Ísraelsmönnum eru Palestínumenn óæðri og þar af leiðandi óþarfi að gráta óæðri börn, drepin af Guðs útvöldu þjóð. Af einhverjum ástæðum hef ég akkúrat enga samúð með Ísraelsmönnum þegar ógæfan dynur á þeim.

Guðs útvalda þjóð?

Ég efast um að israelar séu guðs útvalda þjóð þar sem þeir eru morðingjar og glæpamenn þeir munu brenna í heilögum hreinsunnareldi guðs,þegar palestínumenn hrekja þá úr landi sínu þó handklæðahausarnir séu vondir þá munu þeir aldrei verða jafn slæmir og israelarnir.

Þá að samlíkingunni við Nasista og þegar tengslin við Helförina eru dregin upp – og að Gyðingar eigi að vera betri vegna sögu þeirra sem fórnarlamba meðal annars í Helförinni.

Gyðingar fyrr og nú

Gyðingar voru ofsóttir fyrr á öldum en núna eru það þeir sem ofsækja aðra. Þeir hafa greinilega ekkert lært á því hvernig það er að vera “fórnarlamb” Ætli þetta brjálæðislega hatur hermannanna sé tilkomin vegna þess að þeir voru allir umskornir í æsku?

Höfuðlaus her

Fyrir nokkrum árum sagði einn góður kunningi minn að það, versta sem Hitler gerði á sínum tíma var að kenna Gyðingum hvernig á að standa í útrýmingu minnihlutahópa. Ég held að þessi kunningi minn hafi haft nokkuð til síns máls þó hann hafi fengið að heyra hversu mikill rasisti hann væri. Því miður njóta Ísraelsmenn ennþá mikillar samúðar vegna helfararinar í síðari heimstirjöldini.

Gæta skaltu bróður þíns

Já Ísraelsmönnum hefur liðist meira í gegnum tíðina en öðrum. Heimsbyggðin telur sig þurfa að hafa slæma samvisku gagnvart þeim fyrir helförina. Og það launa þeir með því að nýta sér allt sem þeir lærðu í helförinni og haga sér eins gagnvart nágrönum sínum

Og að lokum, hér er gefið í skyn að verk Gyðinga og Ísraela markist af einstakri grimmd og hryðjuverk Palestínumanna eru afsökuð sökum kúgunnar.

Félagi Jesús og júðarnir

Annars hafa blessaðir júðarnir stundum verið hálf svo einkennilegir í tiltektum sínum. Það er til dæmis ógleymanlegt hvernig þeir fóru með lækninn og sósíalistann, félaga Jesús frá Nasaret; þeir létu sér ekki muna um að krossfesta þann góða dreng fyrir kjafthátt og útborutilhneigingar. Öldum síðar myrtu taglhnýtingar peningahyggjunnar, félaga Che Guivara, en hann var líka læknir og sósíalisti.

15 sekúndur … II

Börn drepin, bara svona af þau lágu vel við höggi.

Skotheld heimild?

Það er að sjálfsögðu ekki réttlætanlegt að drepa saklausa borgaraa en þegar fólk elst upp sem fangar í eigin heimkynnum þá er skiljanlegt að það reyni að spyrna á móti með einu aðferðinni sem er í boði

Hvar er Sderot?

Þá kann einhver að segja að það sé ansi lágt lagst að ráðast á leikskóla en því er til að svara að þessar heimatilbúnu eldflaugar Palestínumanna eru ekki það námkvæmar að þeir geti miðað á ákveðin hús heldur senda þeir eldflaugarnar aðeins eitthvert inn á svæði landránsmanna

Jæja, er ekki kominn tími á skrif á þessari síðu? Ég er allt í einu í þeirri stöðu að ég hef ekkert að gera næstu klukkutímana þangað til að Gay Pride gangan byrjar og þar sem ég nenni ekki út, þá er ekki úr vegi að endurlífga þessa síðu aðeins.

* * *

Ég fór semsagt á Þjóðhátíð í Eyjum um síðustu helgi. Hún var eiginlega alveg fáránlega skemmtileg. Ég fór með fjórum strákum með flugi frá Reykjavík á föstudagskvöldinu og við gistum í húsagarði rétt hjá Herjólfsdalnum. Ég var fljótur að þakka Guði fyrir það því síðast þegar ég var á Þjóðhátíð var ég í tjaldi í dalnum og ég fæ hausverk af því að minnast þess þegar ég vaknaði við fjölskylduskemmtunina á laugardags og sunnudagsmorgninum.

Á föstudagskvöldinu fórum við nokkuð fljótt í Dalinn og horfðum þar á Ragga Bjarna, Doktor Spokk, frumflutning á Þjóðhátíðarlaginu og eitthvað fleira fyrir brennu. Ég dansaði svo með vinum fyrir framan stóra sviðið með Í Svörtum Fötum og litla sviðið með einhverri annarri sveit. Um 5 leytið ákváðu svo allir að stinga mig af, þannig að ég sat eftir með einni vinkonu minni í Brekkunni og ákváðum við fljótlega að segja þetta gott.

Eftir frábæra sundferð á laugardeginum fórum við svo eitthvað út fyrir bæinn þar sem að Ölgerðin var með partí þar sem að meðal annars var keppt í nokkrum hressum íþróttagrein. Ég og vinir mínir mynduðum Team Serrano, þar sem ég var eini fulltrúi Serrano á svæðinu. Við unnum þá keppni með glæsibrag þrátt fyrir að menn hefðu verið orðnir allnokkuð ölvaðir. Það var eiginlega svo að um sex leytið (kl 18 það er) á laugardeginum vorum við flestir orðnir fáránlega fullir. Svo fullir að einn okkar drapst áður en hann komst í Dalinn. Mér tókst að komast í Dalinn og ég horfði á Nýdönsk spila en fann svo á mér að ég væri búinn að drekka aðeins of mörg Tópas skot og var því kominn inní tjald um eitt leytið, sem varð til þess að ég fékk allmörg skot á sunnudeginum.

Á sunnudeginum fórum við í stórskemmtilega sundlaugarferð þar sem að gestir skiptust á að vera með uppistand. Fórum svo í ógeðslega þynnkupizzu og vorum svo mætt í dalinn um 9 leytið. Horfðum á Á móti Sól og einhverjar sveitir og svo auðvitað Brekkusönginn. Sú stund var talsvert ánægjulegri en á síðustu Þjóðhátíð og ég gat á núna hreinlega ekki ímyndað mér stað og stund og félagsskap sem væri betri.

Við dönsuðum svo við tónlist Páls Óskars og þegar það byrjaði að rigna löbbuðum við á milli Hvítra Tjalda þar sem að einn vinur okkar drapst, lífguðum hann svo við, löbbuðum meira um, dönsuðum og skemmtum okkur fram á morgun. Á mánudeginum áttum við flug klukkan 10.10 og vorum því vöknuð rétt fyrir þann tíma. Heyrðum þá að öllum flugum væri frestað og eyddum því fyrstu klukkutímum dagsins liggjandi inní tjaldi, kallandi brandara á milli tjalda þangað til að við fengum upplýsingar um að byrjað væri að fljúga. Þurftum þó að bíða einhverja 3 tíma útá flugvelli þangað til að við fengum flug heim til Reykjavíkur.

Þetta var stórkostleg helgi!

En auðvitað er ferðasagan mun skemmtilegri þegar maður segir hana í eigin persónu með öllum þeim sögum og þeim einkahúmor sem passar ekki alveg inná þessa síðu.

Ég setti inn nokkrar myndir á Flickr myndasíðuna mína, en flestar eru þær læstar nema þeim sem eru skráðir vinir mínir þar, en þarna eru nokkrar góðar myndir. Myndirnar eru líka á Feisbúk hjá mér.

* * *

Í gær fór ég svo útað borða á Tapas barinn og svo á Eric Clapton tónleikana þar sem að mér var boðið. Þessir tónleikar voru ágætir. Hitinn í Egilshöll er auðvitað óbærilegur og hljómurinn ekki sá allra besti, en það eru svo sem ekki stærstu atriðin. Aðallega er ég enginn sérstakur Eric Clapton aðdáandi og því erfitt fyrir mig að skrifa um þá. Ég fíla einfaldlega ekki svona blús-rokk með endalausum gítar- og píanósólóum. En það var samt fínt að vera þarna í tvo tíma og Cocaine gerði þetta þess virði (þótt ég skilji ekki af hverju hann spilaði ekki Layla!). Mikið hefði þó verið skemmtilegra að fá Bruce Springsteen víst það er í tísku að flytja inn sextuga rokkara. Þá hefði ég sko mætt, stillt mér upp við sviðið og öskrað með öllum lögum.

* * *

Jæja, ég ætla að drífa mig niður í bæ í lunch og að horfa á gönguna. Í kvöld ætla ég svo að mæta í afmæli til stærsta aðdáanda Yossi Benayoun á Íslandi og á morgun er ég svo með matarboð fyrir Sigga majónes. Já, þetta stefnir í enn eina frábæra helgi þetta sumarið.  Lífið er yndislegt.

Þegar ég sé svona skoðanakannanir þá eflist trú mín á mannkyninu.

Þegar að menn eru að gera kynningu fyrir fyrirtæki, sem á eftir eitt ár að vera virði 642.000.000.000 króna (642 milljarða), geta menn ekki lagt svona 30 þúsund kall í að láta búa til almennilega kynningu fyrir sig?

Á einni síðunni nota menn bæði kassa og hringi sem bullet point, letrið er ljótt, kynningin nær út fyrir svæðið sem henni er ætlað og svo eru í henni enskar málfarsvillur.

Þeir hefðu átt að nota Keynote.

(via)

Jæja, ég er víst að fara á Þjóðhátíð í dag. Á flug um hálf átta í kvöld til Eyja. Þar verður væntanlega fjör. Ég sé að mbl.is er farið að spá rigningu á sunnudag og mánudag í Eyjum. Vonandi verður það ekki alveg jafnslæmt og síðast þegar ég var í Eyjum.

Ég er orðinn verulega spenntur.